Астанада Ислам даму банкі, Сауд Арабиясының даму қоры, ОПЕК халықаралық даму қоры, Кувейт экономикалық даму қоры және Абу-Даби даму қоры секілді ұйымдарды біріктіретін Араб үйлестіру тобының отырысы өтті, деп хабарлайды inbusiness.kz сайты.
Кездесуге ұлттық экономика министрі Нұрлан Байбазаров, Ислам даму банкі тобының президенті Мұхаммед Сулейман Әл-Джассер, Араб инвестициялық қорлары мен еліміздің мемлекеттік органдары, квазимемлекеттік компаниялардың басшылары қатысқан.
Кездесуде Араб үйлестіру тобының Қазақстандағы инфрақұрылымдық және әлеуметтік жобаларды қаржыландыруына қатысты мәселелер талқыланды. Сондай-ақ кездесуде көлік, энергетика, су ресурстары, денсаулық сақтау салаларындағы жобалар таныстырылды.
Кездесу қортындысы бойынша Араб үйлестіру тобының Қазақстан экономикасына ұзақ мерзімді тікелей инвестициялардың сомасы бастапқы кезеңде 7 млрд долларды құрайтыны айтылған. Болашақта қаржыландыру көлемін ұлғайту жоспарлануда. Сонымен қатар су ресурстары және ирригация министрлігі мен Ислам даму банкі арасында келіссөздерге қол қойылды.
