Түркі әлемі елдерінің өкілдері Бакуде өткен жиында 34 әріптен тұратын латын әліпбиіне негізделген біртұтас әліпбиге келісті, — деп хабарлайды Tengri Life.
Түркі академиясының мәліметінше, 9-11 қыркүйекте Әзірбайжан астанасында Түркі мемлекеттері ұйымы жанынан құрылған Түркі әлемінің біртұтас әліпбиі жөніндегі комиссияның үшінші отырысы өтті.
Басқосудың негізгі мақсаты – осы саладағы жинақталған білім мен комиссияның екі жылдық тәжірибесін пайдалана отырып, түркі тілдерінің біртұтас әліпбиі жобасы бойынша жұмысты аяқтау» деп жазылған баспасөз хабарламасында.
Шараға қатысушы ғалымдар алғаш рет 1991 жылы ұсынған латын әліпбиіне негізделген біртұтас түркі әліпбиінің жобасын қарастырды. «Комиссия егжей-тегжейлі талқылап, осы әліпби жобасын жетілдіруді қажет ететін тұстарды анықтады. Осы тынымсыз жұмыстың нәтижесінде 34 әріптен тұратын біртұтас түркі әліпбиі туралы ұсыныс келісілді», — делінген хабарламада.
Ұсынылған әліпбидің әрбір әрпі түркі тілдерінде кездесетін әртүрлі фонетикалық дыбыстарды білдіретіні нақтыланады.
«Бұл кездесудің сәтті аяқталуының тарихи маңызы бар, біртұтас түркі әліпбиін дамыту түркі халықтарының тілдік мұрасын сақтай отырып, өзара түсіністік пен ынтымақтастыққа септігін тигізеді», — деп атап өтті Түркі академиясы.
Шараны ұйымдастырушылар тиісті мекемелерді «ұсынылып отырған біртұтас түркі әліпбиін жүзеге асыруға тиімді қолдау көрсетуге» шақырды.
Түркі академиясы түркі мемлекеттері ұйымының жанынан құрылған, түркі елдері мен аймақтары арасындағы ғылыми және білім саласындағы ынтымақтастықты дамытуға жәрдемдесетін халықаралық ұйым. Академия құрамына төрт мемлекет – Әзірбайжан, Қазақстан, Қырғызстан және Түркия, сондай-ақ екі бақылаушы – Венгрия мен Өзбекстан кіреді. Оның бас кеңсесі Астана қаласында орналасқан.
Түркі әлемі елдерінің өкілдері Бакуде өткен жиында 34 әріптен тұратын латын әліпбиіне негізделген біртұтас әліпбиге келісті
