4 сәуірде Армения президенті Вахагн Хачатурян «Армения Республикасының Еуропалық Одаққа қосылу процесінің басталуы туралы» заңға қол қойды. Бұл туралы News.am мемлекет басшысының сайтына сілтеме жасап хабарлайды. Бұған дейін, 26 наурызда бұл құжатты Арменияның Ұлттық ассамблеясы (бір палаталы парламент) екінші және соңғы оқылымда қабылдаған болатын.
Қабылданған заңның мәні: Заң бір сөйлемнен тұрады: «Армения Республикасы демократиялық институттарды дамытуға, қоғамның әл-ауқатын жақсартуға, қауіпсіздікті, тұрақтылықты және заң үстемдігін нығайтуға ұмтыла отырып, Армения Республикасының Еуропалық Одаққа қосылу процесінің басталғанын жариялайды».
Армения Сыртқы істер министрінің орынбасары Паруир Ованисян ЕО-ға кіру процесінің басталуы туралы заң жобасы өз алдына мүшелікке өтініш емес екенін түсіндірді. Ол бұл қадам Армения азаматтарының ЕО-мен әріптестікті жаңа деңгейге көтеруге ұмтылысын көрсететінін және елдің теңгерімді сыртқы саясатына сәйкес келетінін атап өтті.
Армения билігі еуроинтеграцияны 2024 жылдың наурызында бастау жоспарын алғаш рет жариялады. Алты айдан кейін, 11 қыркүйекте азаматтардың ЕО-ға кіру туралы заң жобасын Ұлттық ассамблеяға ұсыну туралы бастамасы ресми түрде тіркелді. Бұл бастаманы Арменияның Еуропалық партиясы, Республика, Республика атынан және Христиан-демократиялық партиялары кіретін «Демократиялық күштер платформасы» парламенттен тыс тобы ұсынды.
Заң жобасы үкіметте қаралуы үшін оны 60 күн ішінде кемінде 50 мың адам қолдауы керек. Армения Орталық сайлау комиссиясының мәліметінше, заң жобасы 52 мың адамның қолдауына ие болып, үкіметке жолданды, ол 2025 жылдың 9 қаңтарында оны мақұлдап, парламентке жіберді
